本土社團聲明: 觀審制、參審制、陪審制

【數位網路報記者陳漢墀5/1台北報導】

司法改革是蔡總統2016就任時大家上蓋關心ê議題，就任演講時得著ê 噗仔聲mā上大聲！但是到這馬猶是無真正beh實行民主化ê「陪審制」，hō͘人真失望！

真正民主化，司法審判權定著須要交hō͘人民決定！香港佇1842年英國殖民時代就開始採用陪審團審判，彼時香港人民ê教育程度、法治教育、國際觀等等kám有可能比這馬ê台灣人較懸？眼時前ê台灣人民，連高中學生攏已經有才調寫政治評論ah，啥代咱猶閣無資格實施陪審制？「國情不同」？這是人類歷史上大ê白賊話！

審判權是國家主權對內上懸級ê表現，若會當交hō͘人民來決定，是國家對人民有信心ê表現。所以，咱應該採用陪審團制，kā審判權交hō͘人民，有罪無罪照人民一般生活經驗判斷；法官負責專業ê徒刑輕重決定，這才真真正正是民主！而且，陪審制beh決定須要所有陪審員意見相仝，會當避免所謂「藍綠」干擾ê政治判刑！所以講，司法審判權交還人民是民主化ê「煞尾站」。當然中國國民黨絕對ê反對！ in發明一个「觀審制」，hō͘咱會使徛佇邊a恬恬á看，袂使做啥物決定。M̄相信人民有才調判斷是非！回想往過teh討論總統交hō͘人民直接來選，中國國民黨反動份子攏mā反對；講若是總統直選，台灣會大亂！意思是台灣人水準無夠額，無資格享受這款直接民權。結局leh？全世界佗一國無kā咱o-ló？

強烈支持陪審制！上無mā應該參審制佮陪審制做伙實行，一段時間了後，來比評看啥物才是適合台灣社會佮人民ê制度。